शिवालय गाउँपालिकामा जग्गाको निस्सा वितरणको काम शुरु

जाजरकोट । जाजरकोटको शिवालय गाउँपालिका भित्र बसोवास गरिरहेका भूमिहीन दलित, भूमिहीन सुकुम्वासी तथा अव्यवस्थित बसोवासीलाई जग्गाको निस्सा वितरण शुरु गरिएको छ ।
 पहिलो दिन वडा नम्बर २ कि दुर्पदा वि.क.र वडा नं.९ का धनसिंह सुनार लगाएत शिवालय गाउँपालिकामा बसोबास गरिरहेका भूमिहीन दलित,भूमिहिन सुकुम्वासी तथा अव्यवस्थित बसोवासीलाई जग्गाको निस्सा वितरण गरिएको हो । गाउँपालिकामा प्राप्त निवेदनहरुलाई झण्डै २ वर्षको अवधिमा कम्प्युटरमा दर्ता गरी निस्सा वितरणको काम शुरु गरिएको हो ।
शुक्रबार शिवालय गाउँपालिका वडा नम्बर — २ की दुर्पदा वि.क.लाई पहिलो निस्सा प्रदान गरेर कार्यक्रमको शुरु भएको छ । गाउँपालिकाको कार्यालयमा आयोजित भूमिहीन दलित, भूमिहीन सुकुम्वासी र अव्यवस्थित बसोवासीको निवेदन दर्ताको निस्सा वितरण कार्यक्रममा पालिका अध्यक्ष शेर बहादुर शाही, आयोगका विज्ञ सदस्य नबराज शाही तथा सदस्य चन्द्रा अधिकारीले संयुक्तरुपमा वि.क. सहित १५ जनालाई निवेदन दर्ताको निस्सा प्रदान गर्नुभएको थियो ।

शिवालय गाउँपालिकाका ९ वटा वडामा जम्मा १२ जना भूमिहिन दलित, ५ जना भूमिहिन सुकुम्वासी र ३ सय ३३ जना अव्यवस्थित बसोवासी गरी कुल ३ सय ५० जना छन् । भने बाँकि छुटेका व्यक्तिहरुका लागी केही दिनका लागी म्याद थप गरि अनलाईन प्रविष्टको काम लाई पनि निरन्तरता दिने अध्यक्ष शाहीले जानकारी दिनुभएको छ । साथै अन्य बाँकी निस्साहरु वडा कार्यालयले क्रमस वितरण गर्ने योजना रहेको छ । 
लामो समय सम्म सार्वजनिक तथा ऐलानी जग्गामा बसिरहेका भूमिहीन दलित, भुमिहिन सुकुम्बासीलाई राष्ट्रिय भूमि आयोग जिल्ला समिति जाजरकोटको सहकार्यमा निस्सा वितरण गरिएको हो । शिवालय गाउँपालिकामा रहेका र हालसम्म निवेदन पेस गरेका भूमिहिन दलित, भूमिहिन सुकुम्बासी र अव्यवस्थित बसोबासीको पहिचान गरी भूमिहीन दलित, भूमिहीन सुकुम्वासी र अव्यवस्थित बसोवासीको निवेदन दर्ताको निस्सा वितरण गरिएको अध्यक्ष शेर बहादुर शाहीले जानकारी दिनुभयो ।
निस्सा वितरणको सवै काम सम्पन्न भएपछि छिट्टै नै उनीहरुलाई जग्गाधनी प्रमाणपुर्जा वितरण गरिने गाउँपालिकाले जनाएको छ । ‘पहिलो चरणमा गाउँपालिकामा सबै प्रक्रिया पुगेकाले निस्सा वितरण सुरु गरेका हौं’ अध्यक्ष शाहीले भन्नुभयो– ‘पुर्जा वितरणका लागि नापजाँच टोली आएर जग्गा छुट्याएपछि पुर्जा वितरण गर्छौं ।’ शुक्रबारबाट शुरु यो वितरण कार्य यहि फागुन अन्तिमसम्म चल्ने छ ।

गाउँपालिकाका अध्यक्ष, कार्यपालिका सदस्यहरु,सम्बन्धित वडाका वडाध्यक्ष, वडा सदस्य, सहित नगरका कर्मचारी राष्ट्रिय भुमि आयोगका विज्ञ सदस्य नबराज शाही,सदस्य चन्द्रा अधिकारी, विभिन्न राजनैतिक दलका प्रतिनिधि लगायतको उपस्थितिमा निस्सा वितरण गरिएको थियो ।